Gipahigayon ang usa ka public hearing sa Barangay Sta. Lucia tungod sa mga social media posts nga mahitungod sa problema sa langaw. Mitambong sa maong kalihokan si Mayor Dongkoy, ang representante sa PG3 Poultry Farm, ug mga ahensya nga may kalabutan.
Sa diskusyon, nasuta nga dili lamang ang PG3 Poultry Farm ang naa sa maong dapit. Aduna usab nakit-an nga usa ka backyard egg layering farm sa barangay nga walay permit ug giila nga usa sa naghinungdan sa pagdagsa sa langaw.
Sumala sa Task Force Langaw, wala silay nakitang langaw atol sa ilang inspeksyon sa lugar. Bisan pa niana, misaad ang PG3 Poultry Farm nga motuman sa mga rekomendasyon ug giya nga gihatag sa Task Force Langaw aron mapadayon ang kalimpyo ug malikayan ang problema.
Pasabot ni Mayor Dongkoy nga wala nagkuwang ang LGU sa paglihok batok sa maong problema, gani walay hunong ang task force sa pag inspeksyon ug imbestigar kung asa ang farm nga adunay problema.
Dugang pa, gipasabot usab nga ang bag-ong ordinansa kabahin sa regulasyon sa mga farm ug pagdumala sa kahugawan ipailalom sa public hearing ug aprobahan. Sa ordinansa, ang silot mao ang: 1st offense, warning; 2nd offense, suspension; ug 3rd offense, closure sa establisemento.

Click here: https://www.facebook.com/share/p/1ZVD5scxo5/