Tungod sa posibleng light to moderate ashfall nga mahimong makaapekto sa pipila ka lugar human sa moderately explosive eruption sa Mt. Kanlaon karong buntag, gisuspenso ni Mayor Dana Andrew M. Dumdum ang klase karong adlawa, Hulyo 9, 2026, sa tanang lebel sa pampubliko ug pribadong eskwelahan sa Lungsod sa Asturias, Cebu.

Kini nga lakang gihimo isip pag-amping ug aron mapanalipdan ang kahimsog ug kaluwasan sa mga learners, teachers, school personnel, ginikanan, ug sa kinatibuk-ang komunidad.

Gipahimangnoan ang publiko nga magpabiling alerto ug mag-amping tungod sa posibleng light to moderate ashfall, depende sa direksyon sa hangin.

Ang abo gikan sa bulkan mahimong hinungdan og iritasyon sa mata, ilong, tutunlan, panit, ug baga. Mas gikinahanglan ang dugang pag-amping sa mga bata, learners, senior citizens, mabdos, ug mga indibidwal nga adunay asthma, ubo, allergy, sakit sa baga, sakit sa kasingkasing, o ubang respiratory conditions.

Alang sa kahimsog ug kaluwasan sa tanan, palihug sundon ang mosunod nga mga pahimangno:

1. Magpabilin sa sulod sa balay o building kutob sa mahimo, ilabi na kung adunay namatikdang abo sa palibot.

2. Sirad-i ang mga bintana ug pultahan aron malikayan ang pagsulod sa abo.

3. Paggamit og N95 mask, KN95 mask, o dust mask kung kinahanglan mogawas. Kung walay mask, mahimong gamiton ang limpyo nga panyo o tela nga medyo basa aron tabunan ang ilong ug baba.

4. Paggamit og goggles o eyeglasses aron maprotektahan ang mata.

5. Tabuni ang pagkaon ug tubig aron dili kini mahugawan sa abo. Siguruha nga limpyo ug luwas ang imnon nga tubig.

6. Likayi ang pagpanilhig sa uga nga abo nga makapalupad og abog. Kung kinahanglan manglimpyo, hinay-hinaya og basa ang abo ug paggamit ang mask ug proteksyon sa mata.

7. Limitahi ang outdoor activities, ilabi na sa mga bata, learners, senior citizens, ug sa mga adunay sakit sa baga o kasingkasing.

8. Kung makasinati og lisod nga pagginhawa, grabe nga ubo, hapdos o paghubag sa mata, o uban pang sintomas, duol dayon sa pinakaduol nga health center o medical facility.

Ang lokal nga pangagamhanan sa Asturias, pinaagi sa Municipal Disaster Risk Reduction and Management Office (MDRRMO), padayon nga nag-monitor sa sitwasyon ug nakig-coordinate sa mga hingtungdang ahensya alang sa tukmang impormasyon ug angay nga lakang sa kaluwasan sa tanan.

Gihangyo ang tanan nga magpabiling kalmado, mosunod lamang sa opisyal nga pahibalo, ug likayan ang pagpakaylap sa dili kumpirmadong impormasyon.

Amping kanunay, Asturiasnon!