Gidala sa Local Government Unit of Asturias ang nagkalain-laing serbisyo sa gobyerno mas duol sa katawhan pinaagi sa Asturias One-Stop Serbisyo Caravan, nga gipahigayon karong adlawa, Setyembre 30, 2026, sa Brgy. Bago Covered Court, Asturias, Cebu.

Pinaagi sa maong kalihokan, ang mga residente sa Bago ug kasikbit nga mga lugar nakapahimulos sa nagkalain-laing serbisyo gikan sa LGU, lakip ang social services, serbisyong pang-agrikultura, Local Civil Registry (LCR) services, ug medical services, nga gitigom sa usa ka lugar aron mas sayon ug mas duol kini maabot sa katawhan.

Nakig-alayon usab sa kalihokan ang Office of Third District Representative Hon. Karen Hope F. Garcia, nga nagdala sa PJ&K Diagnostic Van aron makahatag og dugang nga serbisyong panglawas. Lakip niini ang libreng konsultasyon sa mata ug paghatag og libreng antipara, uban ni Dr. Tess Heyrosa.

Mitambong sa Serbisyo Caravan si Mayor Hon. Dana Andrew M. Dumdum ug Vice Mayor Hon. Reine P. Yaras, uban ni Atty. Pablo John F. Garcia, nga mirepresentar sa buhatan ni Congresswoman Karen Hope F. Garcia. Ang ilang presensya nagpalig-on sa panagtambayayong tali sa lokal nga panggamhanan ug sa buhatan sa Third Congressional District sa paghatod sa mga programa ug serbisyo ngadto sa mga komunidad.

Ang Asturias One-Stop Serbisyo Caravan kabahin sa padayon nga paningkamot sa LGU nga dili lamang hulaton ang katawhan sa mga opisina, kondili ihatod mismo ang serbisyo ngadto sa mga barangay; mas duol, mas sayon, ug mas accessible alang sa matag Asturiasnon.

CLICK HERE: https://www.facebook.com/share/p/1DmJr4QAcM/