MAYOR DONGKOY NAKIGDAYALOG SA MGA MAG-UUMA SA LANAO; GIBISITA ANG BAG-ONG TINUBDAN SA TUBIG SA BANBAN
September 15, 2026
Karong Septiyembre 15, 2026, personal nga mibisita si Mayor Dana Andrew M. “Dongkoy” Dumdum sa Barangay Lanao aron maminaw ug motubag sa mga isyu ug kabalaka sa mga mag-uuma sa maong barangay.
Kauban sa Mayor sila Mr. Jade Mesias, Municipal Agriculturist, Mr. Dave Feriol, CSO Focal Person, ug mga opisyal sa barangay sa pakigdayalogo sa mga mag-uuma bahin sa ilang mga panginahanglan, mga programa nga mahimong ma-avail, ug uban pang kabalaka nga may kalabotan sa sektor sa agrikultura.
Atol usab sa panagtagbo, gihatagan og giya ang mga mag-uuma bahin sa hustong proseso sa pagparehistro ug pagpa-accredit sa ilang farmers’ association, aron mahimong mas organisado ang ilang grupo ug mas dali silang maka-access sa mga angay nga programa ug serbisyo.
Human sa pakigtagbo sa mga mag-uuma sa Barangay Lanao, milahos si Mayor Dongkoy sa Barangay Banban aron personal nga susihon ang bag-ong tinubdan sa tubig alang sa water supply sa barangay. Kauban niya sa maong pagbisita si Mr. Richie Macul, Waterworks Focal Person, ug mga opisyal sa barangay.
Ang maong mga pagbisita kabahin sa padayon nga paningkamot sa LGU Asturias nga madungog ang mga panginahanglan sa mga komunidad ug masiguro nga ang mga programa ug serbisyo sa lokal nga panggamhanan makatubag sa aktwal nga kahimtang sa katawhan.
CLICK HERE: https://www.facebook.com/share/p/1JqFWjAdgs/