Nagpadayon ang imbestigasyon ug monitoring sa lokal nga kagamhanan sa Asturias kabahin sa reklamo sa grabeng pagdagsa sa mga langaw sa usa ka poultry farm sa Brgy. Manguiao nga nakaapekto sa pipila ka residente sa maong lugar.

Base sa report sa Task Force Langaw nga nag-conduct og inspeksyon niadtong Abril 27 hangtod Mayo 4, nasuta nga adunay pipila ka bahin sa pasilidad nga kinahanglan pa og mas hugot nga sanitation ug pest control management aron malikayan ang paglala sa infestation ug pagkatag sa mga langaw ngadto sa kasikbit nga komunidad.

Sa inisyal nga inspeksyon, gikatahong adunay usa ka building nga nakitaan og dakong presensya sa langaw samtang ang ubang pasilidad kontrolado pa ang sitwasyon. Nasuta usab nga adunay mga maintenance concern sama sa guba nga netting sa blower area nga posibleng nakadugang sa pag-ikyas sa mga langaw.

Tungod niini, gipahigayon sa LGU Asturias pinaagi sa Task Force Langaw ang usa ka public hearing aron mapaminaw ang mga kabalaka sa mga residente ug aron mahatagan og higayon ang management sa maong poultry facility sa pagpasabot sa ilang mga lakang ug aksyon alang sa pagsulbad sa problema.

Sa maong hearing, gihisgutan ang mga rekomendadong corrective measures lakip na ang:

* hugot nga pagdumala sa poultry waste;
* regular sanitation ug monitoring;
* pagpalig-on sa pest control measures;
* ug pag-ayo sa protective netting sa mga pasilidad.

Giduso usab sa mga otoridad ang mas lig-on nga koordinasyon tali sa management, barangay officials, ug mga residente aron malikayan ang dugang reklamo ug mapanalipdan ang kahimsog sa barangay.

Matod sa LGU, padayon nga pagabantayan ang kahimtang aron maseguro nga nasunod ang environmental sanitation ug public health standards sa maong lugar, samtang gihatagan og importansya ang patas nga proseso ug kooperasyon sa tanang partido nga naapektuhan.

CLICK HERE: https://www.facebook.com/share/p/1BKjnvuMTW/