Ang Lokal nga Kagamhanan sa Asturias pinaagi sa Task Force Langaw, mipahigayon og kalit nga inspeksyon sa usa ka poultry farm sa Barangay Sta. Lucia.
Sumala sa findings sa Task Force Langaw, grabe ang infestation sa langaw sulod ug gawas sa poultry farm, ug nakit-an usab ang sayup nga paglabay sa hugaw sa manok nga nakaapekto sa tibuok Barangay Sta. Lucia.
Gitugutan ang tag-iya sa farm og 48 ka oras gikan sa pagdawat sa report aron ipatuman dayon ang hustong corrective ug control measures, lakip na ang sakto nga pagdumala ug paglabay sa hugaw sa manok aron mapugngan ug mapakunhod ang kadaghanon sa langaw ngadto sa angayang lebel.
Gipasidan-an usab ang tagdumala sa poultry farm nga ang kapakyasan sa pagtuman sulod sa gitakdang panahon mahimong mosangpot sa suspensyon sa sunod nga grow cycle ug non-renewal sa ilang business permit. Padayon usab ang istrikto ug kanunay nga monitoring sa LGU Asturias aron masiguro ang hingpit nga pagtuman sa balaod. Ang bisan unsang paglapas o padayon nga kakulang sa compliance pagaatubangon sumala sa balaod.
Gimando sa LGU Asturias nga ang hustong pagdumala ug paglabay sa hugaw sa manok usa sa mga pinakadakong hinungdan sa pagkontrol sa langaw. Mahinumduman nga mimando si Mayor Dongkoy sa suspensyon sa distribusyon sa hugaw sa manok ngadto sa mga mag-uuma sa mga upper barangays, human matikdan nga kini maoy usa sa mga hinungdan sa pagsamot sa problema sa langaw. Tungod sa maong mando, miubos pag-ayo ug sa ubang lugar halos wala na ang kaso sa infestation sa langaw.
Mipasalamat usab ang LGU Asturias sa concerned citizen nga si Marsha Dela Cerna mipost sa social media, nga maoy nahimong hinungdan aron dali nga matagad ug matubag sa Task Force Langaw ang problema. Sumala sa LGU, ang aktibong partisipasyon sa katawhan pinaagi sa responsable nga pagreport sa mga isyu sa komunidad dako og tabang sa pagpanalipod sa panglawas sa publiko ug sa kalikupan.

CLICK HERE: https://www.facebook.com/share/p/1abKCMCZjU/