Nakabati og kahupayan ang mga residente sa Sitio Tabaydaantaw, Barangay Poblacion human giayo ang problema sa dalan sa maong lugar pinaagi sa inisyatibo ni SB Member Joeboy Dumdum.

Sa iyang post, nangayo og pasaylo si SB Joeboy sa mga lugar nga dugay naabotan sa road repair. Matud niya, nabug-atan ang mga ekipo sa LGU tungod sa kadaghan sa trabaho, ilabina sa mga dalan sa kabukiran nga nangaguba ug naapektuhan sa landslide nga gi-clearing sukad pa sa Bagyong Tino.

Sa dihang nakalugar ang iyang personal nga mga ekipo, iyang gisupportahan ang LGU aron ma-repair ang dalan padulong sa Pondok, Poblacion, lakip ang bahin sa Sitio Tabaydaantaw nga dugay na usab nangayo og pagtagad tungod sa kanunay nga kalapukan kon mag-uwan. Ang gigamit nga ekipo alang sa maong pag-ayo gikan kang kanhi Bise Mayor Joel Dumdum.

Gipahigayon ang pag-ayo kagahapon, nga nakahatag dayon og kausaban sa kahimtang sa dalan. Usa sa mga residente, si Paul Robles, mipahayag sa Facebook: “Salamat Kons Joeboy Dumdum, wala na jud ni lapok diri dapita.”

Ang maong inisyatibo nagpakita sa padayon nga paningkamot sa lokal nga mga opisyal sa pag-atubang sa mga isyu sa imprastruktura bisan pa sa mga hagit nga dala sa mga kalamidad.

Click here: https://www.facebook.com/share/p/1B1g1Nt1xQ/