TAN-AWA | Opisyal na nga naturn-over sa Lungsod sa Asturias, Cebu ang bag-ong Mobile Clinic isip kabahin sa padayong pagpaningkamot sa lokal nga pangagamhanan nga mas mapaduol ang serbisyong medikal ngadto sa katawhan, ilabina sa mga lumulupyo sa last-mile barangays.

Ang maong Mobile Clinic gilauman nga mahimong dakong tabang sa pagpalapad sa serbisyong panglawas sa lungsod, tungod kay ang maong mga serbisyo dili na kinahanglan pang layo nga adtoon sa katawhan. Hinuon, ang Mobile Clinic na mismo ang moduol sa mga barangay aron makahatag og mas dali, mas komportable, ug mas abot-kayang serbisyo alang sa mga Asturiasnon. Lakip sa gilaumang mahatag nga serbisyo sa Mobile Clinic mao ang X-ray, laboratory services, ultrasound, dental services, ug ECG.

Matod ni Mayor Dana Andrew “Dongkoy” M. Dumdum, dako ang ikatabang sa Mobile Clinic sa mga residente, labi na niadtong nagpuyo sa lagyong mga lugar nga kasagarang mogasto pa og mahal nga plete aron makaadto sa sentro sa lungsod o sa ubang pasilidad pangmedikal. Pinaagi niini, ang serbisyo na mismo ang gidala ngadto kanila.

Ang turnover sa Mobile Clinic nagtimaan sa mas lig-ong pagpatuman sa prinsipyo sa administrasyon nga ang katawhan ang sentro sa panerbisyo, diin ang serbisyo sa gobyerno dili lamang maghulat sa katawhan, kondili moduol mismo sa komunidad. Pinaagi sa bag-ong Mobile Clinic, mas gipaduol ang serbisyong medikal alang sa mas himsog, mas lig-on, ug mas maayong kaugmaon sa matag Asturiasnon.