Opisyal nga giturn-over sa Local Government Unit of Asturias ang tulo ka utility vehicles ngadto sa Brgy. Saksak, Brgy. Manguiao, ug Brgy. Lunas, isip kabahin sa padayon nga paningkamot sa pagpalig-on sa serbisyo publiko sa matag barangay.
Ang maong mga sakyanan gituyo aron magamit sa emerhensiya, pagserbisyo sa katawhan, ug mga opisyal nga kalihokan, nga makatabang sa paspas nga pagresponde sa nagkalain-laing panginahanglan sa barangay.
Sumala ni Dongkoy Dumdum, ang inisyatibo kabahin sa iyang long-term nga plano sukad sa iyang paglingkod sa pwesto aron mas mapalambo ang kapasidad sa mga barangay.
“Gusto nato nga matag barangay adunay kaugalingong sakyanan nga magamit sa ilang mga panginahanglan, labi na sa oras sa emerhensiya. Kini usa ka lakang aron mas mapaduol ang serbisyo sa katawhan,” matud pa sa mayor.
Gidugang pa niya nga padayon ang LGU sa pagtrabaho aron makompleto ang tanang 27 ka barangay sa lungsod nga mahatagan og susamang benepisyo sa umaabot.
Ang Local Government Unit of Asturias nagpadayon sa paghatag og suporta sa grassroots level, aron masiguro nga ang serbisyo publiko mahimong mas dali ug responsive sa panginahanglan sa katawhan.

CLICK HERE:https://www.facebook.com/share/p/17hetxmnuB/