Gipahigayon ang Seminar on Fly Management sa poultry farm sa Cebu Apasse, nga nahimutang sa Sitio Panas, Barangay Sta. Lucia, Asturias, Cebu, isip padayon nga lakang sa pagpalig-on sa hustong pagdumala ug pagpugong sa pagdaghan sa langaw sa maong lugar.

Ang kalihokan gitambongan sa mga representante sa Task Force Langaw uban sa mga personnel sa Department of Agriculture Regional Field Office VII, diin gihisgutan ang mga epektibong pamaagi ug maayong pamaagi sa fly management, waste management, sanitation, ug uban pang preventive measures nga makatabang sa pagpamenos sa pagdaghan sa langaw sulod ug palibot sa poultry farm.

Kahinumduman nga sa nangaging mga grow cycle, ang maong poultry farm, nga gipanag-iya ni Mr. Antonio Yu, nakasinati og grabeng pagdaghan sa langaw nga nakaapekto sa pipila ka residente sa Barangay Sta. Lucia ug sa kasikbit nga mga barangay.

Tungod niini, nangita ang administrasyon ni Mayor Dana Andrew “Dongkoy” M. Dumdum og dugang nga mga pamaagi aron matubag ang problema. Lakip niini ang gihimong benchmarking activity sa Ormoc City, diin gitun-an ang mga epektibong sistema ug best practices sa fly management nga mahimong mapahiangay ug magamit sa Asturias.

Human sa pagpatuman sa mga nakat-unan ug girekomendar nga pamaagi, positibo ang nakita nga resulta. Sa miaging duha ka grow cycle, namatikdan nga minimal na lamang ang presensya sa langaw, samtang wala na usab matala nga presensya sa maggots sa maong poultry farm.

Ang maayong resulta nagpakita nga pinaagi sa hustong koordinasyon, regular nga monitoring, teknikal nga giya, ug kooperasyon sa farm management, mahimong epektibong makontrol ang problema sa langaw ug mapanalipdan ang kahimsog ug kaayohan sa mga komunidad nga anaa sa palibot sa poultry operations.

Padayon ang Local Government Unit of Asturias, pinaagi sa Task Force Langaw ug sa pakigtambayayong sa mga hingtungdang ahensya, sa pagmonitor ug pagpatuman sa mga lakang aron masiguro nga mapadayon ang maayong fly management practices sa Lungsod sa Asturias.

CLICK HERE: https://www.facebook.com/share/p/1Dp9n3EwnB/