ASTURIAS NAGSAULOG SA 48TH NATIONAL DISABILITY RIGHTS WEEK
July 23, 2026
ASTURIAS NAGSAULOG SA 48TH NATIONAL DISABILITY RIGHTS WEEK
Gisaulog sa Lokal nga Pangagamhanan sa Lungsod sa Asturias ang 48th National Disability Rights Week pinaagi sa nagkalain-laing kalihokan alang sa mga persons with disabilities (PWDs) gikan sa 27 ka mga barangay sa lungsod.
Ang selebrasyon, nga gipahigayon pinasikad sa Proclamation No. 597, Series of 2024, gisugdan niadtong Hulyo 17, 2026, ug gitapos pinaagi sa usa ka closing ceremony karong adlawa Hulyo 23, 2026. Kini nga tinuig nga kalihokan ginasaulog matag ikatulong semana sa Hulyo aron mapalambo ang kahibalo sa katungod, dignidad, ug inklusibong partisipasyon sa mga tawo nga adunay kapansanan.
Kabahin sa selebrasyon ang usa ka art activity nga adunay temang “Inclusion in Every Stroke: PWD Creativity Meets Indigenous Beauty,” diin gipakita sa mga partisipante ang ilang talento ug pagkamamugnaon pinaagi sa nagkalain-laing artwork.
Gipahigayon usab ang nagkalain-laing dula ug kompetisyon, lakip ang basketball nga giapilan sa mga batan-ong PWD. Ang mga mananaog nakadawat og mga ganti isip pag-ila sa ilang aktibong partisipasyon, abilidad, ug sportsmanship.
Ang maong kalihokan nahimong malampuson pinaagi sa suporta ni Mayor Dana Andrew M. Dumdum, uban nila Ms. Marianee S. Gabriel, MSWDO Head, ug Mr. Dave Feriol, MSWDO-PWD Focal Person.
Pinaagi niini nga selebrasyon, gipamatud-an sa LGU Asturias ang padayon nga pagpaningkamot sa pagtukod og inklusibong komunidad diin ang matag Asturiasnon, bisan unsa pa ang kahimtang o abilidad, adunay patas nga oportunidad nga mahatagan og bili ug molambo ang kinabuhi.
| via Rolly C. Marayan, Cebuano News Writer
| Photos by Jake Serad and Dunhill Ybañez
CLICK HERE: https://www.facebook.com/share/p/18bh7Zx3aT/