Malampusong natapos sa Municipality of Asturias ang tulo ka adlaw nga Municipal Resilience Plan (MRP) Activity, nga gipahigayon pinaagi sa KALAHI-CIDSS Area Coordinating Team (ACT), uban sa aktibong partisipasyon sa Municipal Resilience Team (MResT), mga LGU Department Heads, 27 ka Punong Barangay, mga representante sa barangay, ug community volunteers.

Tumong sa maong kalihokan nga mapalig-on ang kapasidad sa lungsod sa pagpangandam ug pagtubag sa nagkalain-laing risgo ug kalamidad pinaagi sa mas organisado ug risk-informed nga pagplano. Lakip niini ang pag-ila ug paghatag og prayoridad sa mga risgo, paghimo sa mga tumong ug sukdanan alang sa resilience, ug pag-ila ug pag-validate sa angay nga Programs, Projects, and Activities (PPAs).

Sa unang adlaw, gisusi sa mga partisipante ang Municipal Profile, mga resulta sa Barangay Participatory Risk and Vulnerability Assessment (PRVA), ug ang Municipal Risk Map. Pinaagi niini, natino ang mga risgo nga angay hatagan og prayoridad sa lungsod, ingon man ang mga programa ug kalihokan nga makatubag niini.

Sa ikaduhang adlaw, gibahin sa gagmay’ng grupo ang mga partisipante aron masusi ug ma-finalize ang mga tumong, indicators, ug PPAs nga gilakip sa MRP. Gisusi usab ang mga gisugyot nga programa ug proyekto pinasikad sa prayoridad nga mga risgo ug sa aktuwal nga panginahanglan sa matag komunidad.

Sa katapusang adlaw, gipresentar alang sa pag-apruba ang Draft Municipal Resilience Plan, lakip ang mga PPAs, gibanabanang gasto, ug iskedyul sa pagpatuman. Gipahigayon usab ang multi-year prioritization sa mga sub-project nga mahimong mapondohan ubos sa KALAHI-CIDSS Philippine Community Resilience Project (KC-PCRP).

Pinaagi sa partisipasyon ug pagboto sa mga sakop sa MResT, lakip ang 27 ka Punong Barangay, 23 sa 27 ka barangay ang nahimong prayoridad base sa ranking sa mga natino nga PPAs. Ang resulta mahimong importanteng basihanan sa sunod nga mga lakang sa resilience planning ug sa pagpalambo sa mga sub-project ubos sa KC-PCRP.

Ang maong kalihokan nagpakita sa hiniusang paningkamot sa LGU Asturias, mga barangay, ug KALAHI-CIDSS sa pagpalig-on sa kahandam ug kalig-on sa mga komunidad batok sa nagkalain-laing risgo ug kalamidad. Tumong usab niini nga masiguro nga ang mga umaabot nga programa ug proyekto sa lungsod nakabase sa aktuwal nga kahimtang, risgo, ug panginahanglan sa matag komunidad.

Padayon ang Asturias sa pagtukod og mas andam, luwas, ug malig-on nga mga komunidad alang sa tanang Asturiason.

#AsturiasNaturallyAtHome #AsturiasDumdumonTa

CLICK HERE: https://www.facebook.com/share/p/14qL1bxHvhU/