Malampusong gipahigayon ang pagpirma sa Memorandum of Agreement (MOA) tali sa Department of Education (DepEd) ug sa mga lokal nga panggamhanan sa Asturias, Cebu alang sa implementasyon sa DepEd School Building Program.

Girepresenta ni Hon. Dana Andrew M. Dumdum ang Lungsod sa Asturias niining mahinungdanong kalihokan. Kauban niya si Hon. Maria Teresa Carmela Dumdum-Valenzuela, Liga ng mga Barangay President.

Pinaagi niini nga kasabutan, ang Asturias nahimong usa sa mga lokal nga panggamhanan sa Sugbo nga makabenepisyo sa programa, nga gitumong sa pagpalambo ug pagdugang sa mga pasilidad sa mga pampublikong tunghaan. Ang mao nga school building ipatukod ngadto sa Asturias Central Elementary School.

Ang kalihokan gipahigayon pinaagi sa paningkamot sa Liga ng mga Barangay, ubos sa pagpanguna ni LNB National Secretary General ug Cebu Provincial Board Member Tining Martinez.

Kini usa ka mahinungdanong lakang padulong sa mas luwas, mas komportable, ug mas maayong tunghaan alang sa mga kabataan sa Asturias. Sa padayon nga panagtambayayong sa lokal nga panggamhanan, DepEd, ug mga barangay, hinay-hinay natong matubag ang panginahanglan sa atong mga tunghaan ug mapalig-on ang kalidad sa edukasyon sa lungsod.

Ubos sa administrasyon ni Mayor Dana Andrew M. Dumdum, nagpadayon ang Lungsod sa Asturias sa pagpangita ug pagsuporta sa mga programa nga direktang makahatag og kaayohan sa mga tinun-an, magtutudlo, ug sa tibuok komunidad.