Hulyo 3, 2026 — Opisyal nga gibuksan sa Lungsod sa Asturias ang pagsaulog sa 52nd Nutrition Month nga adunay temang “Nutrisyon at Kalikasan, Ating Pangalagaan!”. Kini nahiuyon sa overarching theme sa pagsuporta sa Philippine Plan of Action for Nutrition 2023–2028: “Sa PPAN: Sama-sama sa Nutrisyong Sapat para sa Lahat.”

Ang maong kalihokan gitambongan sa mga opisyal sa munisipyo ug barangay, mga department heads sa LGU, mga municipal ug barangay health workers, ug uban pang kaabag sa pagpalambo sa kahimsog ug nutrisyon sa komunidad.

Atol sa pagbukas sa selebrasyon, gipahimug-atan ni Mayor Dana Andrew “Dongkoy” M. Dumdum ang dakong papel sa hustong nutrisyon sa pagpalambo sa kahimsog ug kalig-on sa matag Asturiasnon. Matod sa Mayor, ang maayong panglawas magsugod sa sakto ug igo nga nutrisyon, limpyo nga palibot, ug aktibong partisipasyon sa tibuok komunidad.

Gipunting usab ni Mayor Dumdum ang padayong pagpatuman sa mga programa ug kalihokan sa LGU nga nagpalig-on sa partisipasyon sa mga barangay, tunghaan, ginikanan, kabataan, ug nagkalain-laing sektor aron mas mapaduol ang kahibalo ug serbisyo sa nutrisyon ngadto sa katawhan.

Pinaagi sa hiniusang lihok sa lokal nga pangagamhanan ug komunidad, padayon nga gipalig-on sa lungsod ang tumong nga makab-ot ang mas himsog, mas lig-on, ug mas aktibong mga Asturiasnon.